Astana Hub қазақстандық технологиялық хабы IT Park Uzbekistan-мен бірлесіп, Hero Training акселерациялық бағдарламасының бесінші ағынына стартаптардан өтінім қабылдады. Бұл туралы Қазақстанның ЦДИАӨМ баспасөз қызметі хабарлады.
Бағдарлама Draper University-мен серіктестікте жүзеге асырылады. Биыл оған Қазақстан, Өзбекстан, Қырғызстан, Тәжікстан, Түрікменстан, Грузия және Әзербайжаннан 11 стартап қатысады.
Командаларды не күтеді: Кремний алқабындағы бес күндік курс. Технологиялық бизнесмендер үшін шеберлік сыныптары, стратегиялық сессиялар, инвесторлармен AMA-кездесулер, жетекші сарапшылардан тәлімгерлік және нетворкингтік іс-шаралар ұйымдастырылады.
Astana Hub басқарушы директоры Танат Өскембаев Hero Training Орталық Еуразиядан келген стартаптар үшін маңызды халықаралық акселерациялық бағдарламалардың бірі екенін мәлімдеді. Бағдарлама жұмыс істеген жылдары 260-тан астам өтінім түсті, олардың ішінен 41 стартап Draper University кампусында офлайн-акселерациядан өтті.
Өскембаев Hero Training түлектері өз өнімдерін дамытуға 3 миллион доллардан астам инвестиция тартқанын және әртүрлі елдерде сатылымды бастағанын айтты. Бұл бағдарламаның тиімділігін растайды, деп қорытындылады ол.
Естеріңізге сала кетейік, акселераторға өтінімдер 7 наурызды қоса алғанда қабылданды. Стартаптар өз өнімдерін MVP және одан жоғары сатыда ұсынды. Олардың үздіктері көмек алып, жобаның өсуін жеделдете алады, сондай-ақ АҚШ нарығында ауқымдауға дайындала алады.