Қазақстан азаматтары республикалық референдум қарсаңында сайлау учаскесін іздеу бойынша цифрлық сервисті пайдалана алады. Дауыс беру 15 наурызға жоспарланған, деп хабарлады ҚР ЦДИАӨМ баспасөз қызметі.
Дауыс беруге арналған қажетті пунктті eGov Mobile мобильді қосымшасында және GOV.KZ порталында бірнеше рет басу арқылы табуға болады.
Қосымшада және порталда «Референдум» арнайы баннері орналастырылған. Баннерді басу арқылы сіз сайлау учаскесін тексеру сервисіне өтесіз.
Әрі қарай тұрғылықты аймағыңызды және ЖСН көрсетіңіз. Деректерді енгізгеннен кейін жүйе автоматты түрде сайлау учаскесінің нөмірін және дауыс беру орнының нақты мекенжайын көрсетеді.
Сервисте «Жиі қойылатын сұрақтар» бөлімі де бар, онда Референдум туралы пайдалы ақпаратты табуға болады.
11 ақпанда Қазақстан президенті Қасым-Жомарт Тоқаев жаңа Конституция жобасы бойынша референдум өткізу туралы жарлыққа қол қойды. Азаматтарға елдің басты құжатының жаңартылған нұсқасы үшін "жақтап" немесе "қарсы" дауыс беру ұсынылады.
