2026 жылдың сәуір айынан бастап қазақстандықтар жүргізуші куәлігінің мерзімі біткеннен кейін де eGov.kz порталы және eGov Mobile мобильді қосымшасы арқылы ауыстыра алады. Бұл туралы Қазақстанның ЦДИАӨМ баспасөз қызметі хабарлады.
Бұған дейін бұл қызмет онлайн форматта тек жарамды құжат болған жағдайда, жоғалған, ұрланған немесе аты-жөні өзгерген кезде ғана көрсетілетін.
Жаңалық жүргізуші куәлігінің барлық санаттарына қатысты. Медициналық тексеруден өткен пайдаланушылар үшін өтінім берілген кезде мәліметтер мемлекеттік ақпараттық жүйелерден автоматты түрде жүктеледі.
Егер азамат жүргізуші куәлігін алдын ала жаңартса, медициналық тексеруден өтудің қажеті жоқ. Қызмет бар болғаны 1 сағатта көрсетіледі.
Ол үшін пайдаланушы eGov.kz порталында авторизациядан өтіп, «Азаматтарға» – «Көлік және коммуникациялар» – «Автомобиль көлігі» бөліміне өтуі керек. Фотосуретті бұрын берілген құжаттан алуға болады. Дайын куәлік жақын маңдағы ХҚКО-ға келіп түседі.