QyzPU оқытушылары Apple курстарында Swift бағдарламалау тілін меңгерді
ЖИ-ассистент iOS, macOS және iPadOS жүйелерінде қолданбалар жасауға көмектеседі
Қазақ ұлттық қыздар педагогикалық университетінің (QyzPU) оқытушылары Жұлдыз Базаева мен Айнұр Базарбаева Apple-дің білім беру бағдарламасын меңгеріп, Swift бағдарламалау тілін үйренді. Оларға халықаралық үлгідегі сертификат берілді, деп хабарлады Қазақстанның Ғылым және жоғары білім министрлігінің баспасөз қызметі.
Оқу курсын iTeacher Academy – Apple Authorized Reseller ұйымдастырды. Swift бағдарламалау тілі iOS, macOS және iPadOS платформаларына арналған қолданбаларды әзірлеуге арналған.
Бағдарламаға бағдарламалау процесінде жасанды интеллект құралдарын қолдану тақырыбы енгізілді. ЖИ-ассистент оқытушының идеясы негізінде бастапқы код пен қолданба құрылымын қалыптастыруға көмектеседі.
Swift бағдарламалау тілін меңгеру студенттердің мобильді қосымшаларды әзірлеудегі практикалық дағдыларын жетілдіруге және IT саласындағы кәсіби мүмкіндіктерін кеңейтуге көмектеседі.
Apple-ден алған дайындық арқасында педагогтар студенттерге Swift мүмкіндіктерін интерактивті форматта көрсете алады. Оқушылар нақты уақыт режимінде өздерінің мобильді қосымшаларының прототиптерін әзірлейді. Бұл тәсіл олардың бағдарламалаудағы құзыреттілігін арттырады.
