"Самұрық-Қазына" үшін қазақстандық IT-шешімдерді сатып алу тетігі республикада енгізілді
Astana Hub-та IT-компаниялар мен өнімдер тізілімі қалыптастырылады
Қазақстанның Цифрлық даму, инновациялар және аэроғарыш өнеркәсібі министрлігі «Самұрық-Қазынамен» бірлесіп, қордың еншілес ұйымдары үшін отандық IT-шешімдерді басымдықпен сатып алу тетігін әзірледі. Бұл туралы ведомствоның баспасөз қызметі хабарлады.
«Самұрық-Қазына» және акцияларының 50%-ы және одан да көбі қорға тиесілі ұйымдар үшін сатып алуды жүзеге асыру тәртібіне өзгерістер 2026 жылғы 21 қыркүйектен бастап күшіне енді. Astana Hub технологиялық хабы Бірыңғай тауарлар, жұмыстар және көрсетілетін қызметтер номенклатуралық анықтамалығының (БТЖҚНА) скорингін, санаттарын және кодтарын ескере отырып, отандық IT-компаниялар мен өнімдер тізілімін қалыптастырады.
Арнайы тізілімге енгізілген Astana Hub резиденттерінен тиісті жұмыстар мен қызметтерді басымдықпен сатып алу көзделеді.
Негізгі рәсімдерді автоматтандыру үшін zakup.sk.kz және Astana Hub базалары біріктіріледі. Бұл шарттарды жасасу мерзімін 10 жұмыс күніне дейін қысқартуға мүмкіндік береді.
Жаңа тетік аясында сатып алулар Astana Hub резиденттерінен баға ұсыныстарын сұрату арқылы жеңілдетілген тәртіппен жүргізіледі. Бұл ретте басымдықты жұмыстар мен қызметтер тізбесін «Самұрық-Қазына» Ақпараттық технологиялар жөніндегі сараптамалық кеңесінің мүшелері бекітеді.
Пилоттық жоба 2027 жылғы 1 шілдеге дейін жалғасады. Қазақстанның Цифрлық даму, инновациялар және аэроғарыш өнеркәсібі министрлігі бұл отандық IT-секторын дамыту және тиімді шешімдерді масштабтау үшін тағы бір ынталандыру болады деп есептейді. Сонымен қатар, сатып алу тетігі қазақстандық әзірлемелерді монетизациялаудың қосымша құралына айналады.
Пікірлер