Астанада газ қосуға өтінім беру онлайн режимге ауыстырылды
Қызметті QazaqGaz Aimaq көрсетеді
Қазақстанның Энергетика министрлігі елдің отын-энергетика кешенін (ОЭК) цифрландыруды енгізуде. Қазірдің өзінде газ желілеріне қосылу рәсімі онлайн форматқа ауыстырылды, деп хабарлады ведомствоның баспасөз қызметі.
Жыл сайын келіп түсетін 120 мың өтінімнің шамамен 80%-ы, яғни 95 мыңға жуығы техникалық шарттарды (ТШ) алуға арналған өтінімдер онлайн режимде өңделеді. QazaqGaz Aimaq – техникалық шарттарды онлайн беру қызметін көрсететін табиғи монополиялардың жалғыз субъектісі.
Қазақстандықтар ТШ-ны eGov порталы және eGov Mobile қосымшасы арқылы ала алады. Құжат заңмен белгіленген мерзімде: 5-тен 10 күнге дейін беріледі.
Қазақстанның Энергетика министрлігі газ тарату желілеріне қосылу процесін, оның ішінде газды кесу және іске қосуды цифрландыруды жоспарлап отыр. QazaqGaz Aimaq бұл қызметтерді 2027 жылы автоматтандырады.
Қазіргі уақытта қызмет Астанада пилоттық режимде енгізілген. Сондай-ақ, сервис Алматыда және Атырау облысында 2027 жылдың соңына дейін іске қосылады. Содан кейін жоба республиканың барлық аумағына таратылады.
Комментарии