Volvo жүк көліктерін Қазақстанда шығару жоспарлануда

Astana Motors компаниясы мен Volvo Group концерні республика аумағында Volvo жүк көліктерін өндіруге дайындықты көздейтін ынтымақтастық туралы меморандумға қол қойды. Бұл туралы Қазақстанның Өнеркәсіп және құрылыс министрлігінің баспасөз қызметі хабарлады.

Келісімге 12 маусымда Қазақстан-Швеция сауда-экономикалық және инвестициялық ынтымақтастық жөніндегі екіжақты комиссиясының отырысы барысында қол қойылды. Іс-шара Астанада өтті.

Министрлік бірінші кезеңде Volvo FH13 тартқыштарын өндіруді жолға қоюды қалайтынын атап өтті. Жүк автомобильдері алыс қашықтыққа тасымалдауға арналған. Сонымен қатар, Volvo FMX13 автомобильдерін шығару да мүмкін. Олар өнеркәсіпте және құрылыс алаңдарында белсенді қолданылады.

Естеріңізге сала кетейік, өткен жылы Volvo Trucks компаниясы Қазақстанда алғашқы сервистік станциясын ашқан болатын. Республиканың Өнеркәсіп және құрылыс министрлігі өндірісті іске қосу екі ел арасындағы серіктестікті жаңа деңгейге көтереді деп сенімді.