Бұрғылау қалдықтары Қазақстанда жол құрылысында қолданылады
Жобамен "ҚазжолҒЗИ" мамандары айналысады
Қазақстан жол ғылыми-зерттеу институты («ҚазжолҒЗИ») мен «Karachaganak Petroleum Operating B.V.» басшылығы республикада жол құрылысында бұрғылау қалдықтарын (цемент ерітіндісінен, қабаттық сулардан және бұрғылау шламдарынан тұрады) пайдалану бойынша ынтымақтастық туралы меморандумға қол қойды. Бұл туралы Қазақстан Көлік министрлігінің баспасөз қызметі хабарлады.
Құжатта тараптар автомобиль жолдарын салу, қайта құру және жөндеу үшін бұрғылау қалдықтарын пайдалану технологияларын зерттеп, енгізетіні көрсетілген.
Сондай-ақ, тұрақты даму мен экологиялық қауіпсіздікке қойылатын заманауи талаптарды ескере отырып, республиканың нормативтік-техникалық базасын жетілдіру бойынша ұсыныстар дайындау қарастырылған.
Сарапшылар бұрғылау қалдықтары және олардың жол құрылысы үшін қайталама материалдар ретіндегі тиімділігі туралы деректерді жинауы керек. Бұрғылау қалдықтарын пайдалану «жасыл» технологияларды дамыту бағыттарының біріне айналуы мүмкін. Бұл әсіресе экологиялық тазалыққа және ресурстарды ұтымды пайдалануға қойылатын талаптарды ескергенде маңызды.
«ҚазжолҒЗИ» вице-президенті Нұржан Мұқаев бұрғылау қалдықтарын пайдалану – тұйық циклді экономикаға қарай жасалған практикалық қадам екенін мәлімдеді. Институт жобаны ғылыми сүйемелдеуді қамтамасыз етеді, соның ішінде технологияның Қазақстан климатына қолданылуын бағалайды, деп қорытындылады ол.
Комментарии