Astana Hub технологиялық хабында International Data Corporation (IDC) американдық зерттеу компаниясының Қазақстанның бұлтты сервистері мен коммерциялық деректерді өңдеу орталықтары (ДЦӨ) нарығы бойынша есебінің тұсаукесері өтті. Бұл туралы республиканың ЦДИАӨМ баспасөз қызметі хабарлады.
Іс-шараға ведомство басшысы Жаслан Мәдиев, бизнес өкілдері мен сарапшылар қауымдастығы қатысты. Министрдің айтуынша, цифрлық сервистерді дамыту және жасанды интеллект технологияларын енгізу есептеу инфрақұрылымының қолжетімділігіне байланысты.
Сондықтан мемлекет үшін технологиялық трендтерді ғана емес, нарықтың нақты көлемін, сұраныс динамикасын және қуаттылықтың өсу перспективасын түсіну маңызды.
IDC есебінде 2025 жылы республикадағы бұлтты сервистер нарығының көлемі 117,6 млрд теңгеге жететіні көрсетілген. 2022 жылдан бастап жылдық орташа өсім 26%-ды құрады. Нарықтың негізгі сегменттерінің бірі - SaaS моделіндегі бұлтты қосымшалар, екінші орында сервис ретіндегі инфрақұрылым, үшінші орында - платформалық шешімдер.
Америкалық сарапшылардың болжамынша, 2029 жылға қарай нарық көлемі 257,2 млрд теңгеге дейін өседі. Сұранысты бизнес және мемлекеттік құрылымдар жасанды интеллект технологияларын енгізу аясында қалыптастырады.
2025 жылғы мәліметтер бойынша, коммерциялық ДЦӨ сыйымдылығы 4 мың тірекке жетті, ал жүктеме коэффициенті - 91%. Бұл жаңа жобалар үшін есептеу қуаттылығын кеңейту қажеттілігін растайды.