Smart city дамуына арналған халықаралық форум Астанада 2026 жылы өтеді
Қазақстан Global Digital Economy Cities Alliance-пен келісімге қол қойды
Қазақстанның Цифрлық даму, инновациялар және аэроғарыш өнеркәсібі министрлігі Smart region / Smart city жобаларын және жасанды интеллект технологияларын дамыту үшін Global Digital Economy Cities Alliance (DEC40) халықаралық ұйымымен өзара түсіністік туралы меморандумға қол қойды. Бұл туралы ведомствоның баспасөз қызметі хабарлады.
DEC40 ақылды қалалар саласында озық цифрлық шешімдерді ілгерілету үшін технологиялық компаниялар мен ғылыми ұйымдарды біріктіреді. Ынтымақтастық аясында Қазақстанға әлемдік деңгейдегі әзірлеушілерді тарту, қалаларды цифрлық трансформациялаудың үздік тәжірибелерімен алмасу көзделген.
Сонымен қатар, 2026 жылы Астанада DEC40 мүшелерінің, сарапшылар мен инвесторлардың қатысуымен Smart City бойынша халықаралық форум өткізіледі.
Форум өңірлік жобаларды таныстыру, B2G- және B2B-кездесулер өткізу, қаржыландыру тетіктерін және заманауи цифрлық шешімдерді енгізуді талқылау үшін алаң болады.
Қазақстанның Цифрлық даму, инновациялар және аэроғарыш өнеркәсібі вице-министрі Бахтияр Мұхаметқалиев DEC40-пен келісім республика үшін жаңа инвестициялық мүмкіндіктерге жол ашатынын мәлімдеді. Бұл ретте биліктің міндеті – Қазақстанның әрбір өңірі AI Native City жобаларын іске асыратын жағдайлар жасау, деп қорытындылады шенеунік.
Комментарии