Қазақстандық оқушы ЖИ көмегімен қатерлі ісікті анықтау жүйесін жасады

Тараз қаласындағы Зияткерлік мектептің 11-сынып оқушысы Арнұр Артықбай машиналық оқыту негізінде қатерлі ісіктерді автоматты түрде анықтау жүйесін жасады. Ол Фениксте өткен Regeneron ISEF 2026 Дүниежүзілік ғылыми-инженерлік көрмесінің арнайы жүлдесін жеңіп алды. Бұл туралы Қазақстан Республикасы Оқу-ағарту министрлігінің баспасөз қызметі хабарлады.

Жоба ЖИ технологияларын қолдана отырып, онкологиялық ауруларды ерте диагностикалауға бағытталған. Өзінің әзірлемесі үшін оқушы 400 доллар көлемінде сыйлық, сондай-ақ Сауд Арабиясындағы Мұнай және пайдалы қазбалар университетінен білім грантын алды.

Байқауға әлемнің 60-тан астам елінен 1700-ге жуық жас инженер қатысты. Қазақстанды 5 ғылыми жобамен 7 оқушы таныстырды.

Regeneron ISEF – оқушылардың ғылыми-инженерлік жобаларын таныстыруға арналған беделді алаң. Оны жетекші университеттер мен қорлар, соның ішінде Сауд Арабиясынан келген MAWHIBA Foundation қолдайды. Қазақстан байқауға 1999 жылдан бері қатысып келеді.