Yessenov University ғалымдары ауыл шаруашылығы жануарларының мінез-құлқын және физиологиялық жағдайын интеллектуалды бақылау жүйесін әзірледі. Бұл туралы Қазақстан Ғылым және жоғары білім министрлігінің баспасөз қызметі хабарлады.
Ғылыми жобаға Белгород мемлекеттік ұлттық зерттеу университеті профессорының қатысуымен «Компьютерлік ғылымдар және жасанды интеллект» факультетінің студенттері қатысты. Олар компьютерлік көру модулі бар жем таратқышты, стационарлық бейнебақылау жүйесін, жануарлардың жағдайын талдауға арналған жылжымалы роботтық платформаны ұсынды.
Мақсат – физикалық байланыссыз физиологиялық және мінез-құлық параметрлерін автоматтандырылған талдауды қамтамасыз ететін компьютерлік көру, жасанды интеллект және робототехника технологиялары негізінде жануарларды бақылаудың цифрлық платформасын әзірлеу.
Осы әзірлеме арқылы ғалымдар Маңғыстау облысындағы мал шаруашылығындағы шектеулер мен өндірістік тәуекелдерді еңсеруді жоспарлады.
Жүйе жануарларды бақылау деректерін келесі параметрлер бойынша автоматты түрде талдайды:
- қозғалыс белсенділігі
- жемді тұтыну
- топтағы мінез-құлық
- стресс белгілері
- физикалық жағдайдың өзгеруі
Yessenov University ғалымдары жүйені өндірістік жағдайда сынақтан өткізді. Ол фермерлерге деректерге негізделген шаруашылықты басқару моделіне көшуге көмектеседі деп күтілуде.
