Зақымдалған шеміршек және сүйек тіндерін қалпына келтірудің жаңа технологиялары «Пәнаралық травматология және ортопедия: диагностикадан оңалтуға дейін» атты XIII Халықаралық конференцияда таныстырылды. Іс-шара Астанадағы Батпенов атындағы Ұлттық травматология және ортопедия ғылыми орталығында өтті. Бұл туралы Қазақстан Денсаулық сақтау министрлігінің баспасөз қызметі хабарлады.
Батпенов атындағы ҰТОҒО травматолог-ортопеді Меруерт Махметова инъекциялық биокомпозитті гидрогель жасады. Ол тіндерді қалпына келтіру үшін зақымдалған аймаққа енгізіледі. Гельдің құрамына пациенттің өзіндік мезенхимальды дің жасушалары мен өсу факторлары кіреді.
Әзірлеме тобық буынының таран сүйегінің остеохондральды ақауларын хирургиялық емдеу үшін үлкен перспективаларға ие. Меруерт Махметова өз жұмысымен «Батпенов оқулары» байқауында жас ғалымдар арасында бірінші орын алды.
2026 жылы конференцияға Қазақстаннан және шетелдерден 850-ден астам қатысушы жиналды. Іс-шара бағдарламасында 190-нан астам баяндама және 5 көрсетілімдік операция болды.
Тақырыптық сессияларда медицинадағы жаңа бағыттар талқыланды: тізе буынын робот-ассистенттелген эндопротездеу, күрделі ревизиялық эндопротездеу, балалар ортопедиясы, вертебрология және оңалту. Қазақстан Денсаулық сақтау министрлігінің өкілдері дәрігерлерді қажырлы еңбегі мен мамандыққа деген сүйіспеншілігі үшін марапаттады.