Қарағанды индустриялық университетінің «Металлургия» орталығында стандартқа сай емес шикізатты пайдалана отырып, кремний құрамды қорытпалар өндіру әдісі әзірленді. Сынақтар қуаттылығы 250 кВА руда-термиялық электр пешінде жүргізілді, деп хабарлады Қазақстанның Ғылым және жоғары білім министрлігінің баспасөз қызметі.
Зерттеудің мақсаты – микрокремнеземді пайдалана отырып, кристалды кремний мен ферросилиций балқыту технологиясының тиімділігін бағалау.
Зерттеу нәтижелері қайталама материалдық ресурстарды өндірістік циклге тарту мүмкіндігін растайды. Ұсынылған технология металлургиялық қалдықтардың көлемін азайтуға және қоршаған ортаға экологиялық жүктемені төмендетуге мүмкіндік береді.
Қазақстандық ғалымдар микрокремнезем негізінде жасалған брикеттелген шихтаны пайдалана отырып, техникалық кремний балқыту технологиясын сынақтан өткізді. Оны өнеркәсіптік өндіріске енгізуге болады.
ЖОО баспасөз қызметі зерттеушілердің ресурстарды үнемдейтін технологияларды дамытуға, сондай-ақ қалдықсыз өндіріс циклін құруға бағытталғанын атап өтті. Техникалық кремний полимерлер жасау, күн панельдерін және жартылай өткізгіштерді шығару үшін сұранысқа ие.